XI Рэспубліканская студэнцкая навукова-практычная канферэнцыя «Пытанні германскай філалогіі і методыкі навучання замежным мовам»

22 красавіка 2016 года на факультэце замежных моў адбылася рэспубліканская студэнцкая навукова-практычная канферэнцыя «Пытанні германскай філалогіі і методыкі навучання замежным мовам».

У працы канферэнцыі прымалі ўдзел студэнты з ВНУ Беларусі (Мінск, Брэст), Расіі (Масква), Украіны (Чарнігаў). Наш універсітэт быў прадстаўлены студэнтамі факультэта замежных моў, фізіка-матэматычнага, псіхолага-педагагічнага і філалагічнага факультэтаў.

На пленарным пасяджэнні, як і ў папярэднія гады, мы былі рады вітаць выпускніцу факультэта замежных моў, чыё навуковае даследаванне пацвердзіла свой высокі ўзровень на Рэспубліканскім конкурсе навуковых прац. Так, А.А. Лашкевіч расказала пра прынцыпы фарміравання сацыякультурнай кампетэнцыі вучняў на аснове лінгвакраязнаўчых аўтэнтычных матэрыялаў.

Акрамя гэтага, прагучалі даклады студэнтаў 5-га курса факультэта замежных моў К. Саўчук і А. Лукшы, якія даследуюць розныя аспекты массмедыяльнага і палітычнага дыскурсу.

У ходзе секцыйных пасяджэнняў абмяркоўваліся актуальныя праблемы лінгвадыдактыкі, сучасных метадаў навучання замежным мовам, інтэрпрэтацыі мастацкага тэксту і літаратуразнаўства, лінгвістыкі і міжкультурнай камунікацыі. Дзякуючы добраму аснашчэнню факультэта замежных моў сучаснымі сродкамі мультымедыя, усе жадаючыя змаглі паказаць мультымедыйныя прэзентацыі па выніках сваіх даследаванняў.

Усе ўдзельнікі адзначылі добразычлівую працоўную атмасферу канферэнцыі, а таксама вопыт навуковых выступленняў і дыскусій, набыты на падобных мерапрыемствах.

Я. Крылова,
старшыня СНТ
факультэта замежных моў