З’езд батанічных садоў краін СНД

19-21 верасня 2016 года, напярэдадні 25-годдзя стварэння Садружнасці Незалежных Дзяржаў у Мінску прайшоў III З’езд Савета батанічных садоў краін СНД пры Міжнароднай асацыяцыі акадэмій навук. У працы З’езда прыняў удзел начальнік Цэнтра экалогіі нашага ўніверсітэта Аляксандр Пятровіч Колбас, які выступіў з дакладам «Роля Цэнтра экалогіі Установы адукацыі «Брэсцкі дзяржаўны ўніверсітэт імя А.С. Пушкіна» ў захаванні біялагічнай разнастайнасці і развіцці экалагічнай адукацыі». Дакладчык асвятліў пытанні стварэння, утрымання i выкарыстання жывых калекцый у экалагічнай адукацыі падрастаючага пакалення.

Прэзідыумам З’езда была дадзена высокая ацэнка дзейнасці супрацоўнікаў Цэнтра ў апошнія гады па захаванні і развіцці батанічных калекцый, а таксама іх выкарыстанні ў адукацыйным працэсе і навуковых даследаваннях. Старшыня Савета, дырэктар Галоўнага батанічнага саду імя М.В. Цыцына Расійскай акадэміі навук Аляксандр Сяргеевіч Дзямідаў і сустаршыня Савета, акадэмік Уладзімір Мікалаевіч Рашэтнікаў адзначылі значную ролю Цэнтра ў падтрыманні біяразнастайнасці ў Брэсцкім рэгіёне і выказалі падзяку калектыву Цэнтра.

На З’ездзе прагучалі таксама даклады прадстаўнікоў найбуйнейшых батанічных садоў Расіі, Беларусі, Казахстана, Кіргізстана, Украіны і Азербайджана. Навукоўцы расказалі аб новых распрацоўках і дасягненнях у інтрадукцыі раслін, абмяняліся думкамі па далейшых перспектыўных напрамках работы і новых сумесных праектах.

Цэнтр экалогіі