Зоі Пятроўне Мельнікавай споўнілася 60 гадоў

25 верасня 2014 года споўнілася 60 гадоў доктару філалагічных навук, прафесару кафедры беларускага літаратуразнаўства Зоі Пятроўне Мельнікавай. З гэтай нагоды на Савеце ўніверсітэта адбылося яе ўрачыстае ганараванне. З віншавальным словам выступіла рэктар універсітэта доктар педагагічных навук, прафесар Ганна Мікалаеўна Сендзер. Яна адзначыла вялікі ўклад З.П.Мельнікавай у развіццё нашай навучальнай установы, беларускую філалагічную навуку. Асабліва была падкрэслена праца Зоі Пятроўны і створанага ёю навуковага калектыву па напісанні падручнікаў па роднай літаратуры для 10 і 11 класаў, па якіх сёння вучацца дзеці ўсіх школ Беларусі. Ганна Мікалаеўна ўручыла З.П.Мельнікавай ганаровы знак “Выдатнік адукацыі” і пажадала ёй здароўя, новых навуковых дасягненняў, даўгалецця.

З віншавальнымі словамі ў адрас Зоі Пятроўны выступілі таксама дэкан філалагічнага факультэта В.А.Фелькіна, загадчык кафедры беларускага літаратуразнаўства У.А.Сенькавец, загадчык кафедры беларускага мовазнаўства і дыялекталогіі Л.В.Леванцэвіч, прафесар М.П.Осіпава.

На філалагічным факультэце адбылася святочная імпрэза ў гонар З.П. Мельнікавай. Літаратурна-музыкальную кампазіцыю падрыхтавалі студэнты пад кіраўніцтвам выкладчыкаў кафедры беларускага літаратуразнаўства А.С.Кавалюк і Г.М.Ішчанка. Цёплымі словамі Зою Пятроўну павіншавалі калегі, загадчыкі кафедраў, настаўнікі, сябры, студэнты.

Са святам, шаноўная Зоя Пятроўна! Заставайцеся і надалей жыццярадаснай, абаяльнай, поўнай сіл і здароўя!

Філалагічны факультэт