Фінал першага рэгіянальнага конкурсу ў сферы інфармацыйных тэхналогій «IT – мяжа»

22 красавіка 2014 года на базе БрДУ імя А.С.Пушкіна адбыўся фінал першага рэгіянальнага конкурсу ў сферы інфармацыйных тэхналогій для вучняў вучэбных устаноў Брэсцкай вобласці «IT – мяжа». Яго арганізатары – фізіка-матэматычны факультэт і ЗААА «EPAM Systems».

Конкурс праходзіў у два этапы. Першы – дыстанцыйны. Удзельнікі высылалі апісанні прац на электронны адрас аргкамітэта. З прадстаўленых прац аргкамітэт у складзе дэкана фізіка-матэматычнага факультэта А.А.Катлоўскага, дырэктара Брэсцкага філіяла «EPAM Systems» С.А.Тузіка, загадчыка кафедры прыкладной матэматыкі і тэхналогій праграмавання А.В.Матысіка, загадчыка кафедры інфарматыкі і камп’ютарных сістэм В.У.Трыгука і дацэнта кафедры прыкладной матэматыкі і тэхналогій праграмавання А.А.Казінскага адабрала для ўдзелу ў фінале 13 прац. Журы адзначыла высокі прафесійны ўзровень прадстаўленых праектаў. 

Пераможцамі конкурсу сталі:

Уладзіслаў Собаль і Андрэй Шумак – вучні ДУА «Гімназія №1 г.Брэста» («Спектральны аналіз у распазнаванні музычных кампазіцый»);

Уладзімір Ганчала – вучань ДУА «СШ №6 г.Кобрына» («Праектаванне і распрацоўка мабільнага дадатку «Kobrin Guide»»);

Павел Сенчанка – ДУА «Гімназія №1 г.Брэста» («Стварэнне сучаснай мовы праграмавання для выкарыстання ў сферы навучання»).

Пераможцы атрымалі каштоўныя прызы і граматы ад кампаніі «EPAM Systems». Усім удзельнікам фіналу былі ўручаны дыпломы.

Віншуем пераможцаў! Будзем спадзявацца, што згаданы конкурс стане традыцыйным і ў далейшым будзе знакавай падзеяй для вучняў Брэстчыны.

А.А.Катлоўскі,

дэкан фізіка-матэматычнага факультэта