Журналістыка – прафесія маладых!

22–25 красавіка 2014 года студэнты-журналісты з Брэста, Гродна, Мінска і іншых гарадоў рэспублікі, а таксама вучні сярэдніх агульнаадукацыйных і спецыяльных устаноў г.Брэста сабраліся на філалагічным факультэце для абмену вопытам, цікавымі ідэямі, сваімі адкрыццямі ў журналістыцы.

Арганізатарамі Тыдня журналістыкі выступілі кафедра журналістыкі, савет студэнцкага самакіравання філалагічнага факультэта, прафсаюзны камітэт студэнтаў нашага ўніверсітэта.

Праграма Тыдня была насычанай, уключала сустрэчу з ветэранамі Ленінскага раёна г.Брэста і прэзентацыю выдання «Урокі мужнасці і натхнення: да 70-годдзя вызвалення Беларусі ад нямецка-фашысцкіх захопнікаў», майстар-класы ад вядучых журналістаў Брэста, медыяпалігон, фотакрос, форум-тэатр, экскурсіі і многае іншае.

Удзельнікам прыйшлося працаваць цэлы дзень: здабываць навіны ў фармаце татальнай журналістыкі за абмежаваны час; прайсці паў-Брэста ў пошуках цікавага кадра пра горад, людзей, універсітэт; сыграць не адну ролю на форум-тэатры; спасцігаць вопыт і веды прафесіяналаў на майстар-класах...

Аднак з усімі гэтымі выпрабаваннямі яны справіліся, увесь дынамічны старт быў зададзены ўжо ў першы дзень. А на сустрэчы з ветэранамі вайны і працы кожны з удзельнікаў Тыдня зноў упэўніўся, што свет пакараецца толькі людзям з актыўнай жыццёвай пазіцыяй.

Форум у чарговы раз прадэманстраваў, што журналістыка – прафесія маладых! Творчыя, мабільныя, актыўныя, удзельнікі Тыдня зрабілі яго яркай падзеяй у жыцці факультэта, універсітэта, горада.

Кафедра журналістыкі