X міжнародная выстава-кірмаш “Садзейнічанне здароваму ладу жыцця – 2014”

З 18 па 20 верасня 2014 года наш універсітэт прымаў удзел у X міжнароднай выставе-кірмашы “Садзейнічанне здароваму ладу жыцця – 2014”, якая праходзіла ў г. Брэсце.

На выставе былі прадстаўлены больш за 100 тэматычных матэрыялаў выкладчыкаў і спецыялістаў нашага ўніверсітэта.

На працягу ўсіх дзён працы выставы-кірмашу наведвальнікаў кансультавалі педагогі-псіхолагі і сацыяльныя педагогі аддзела выхаваўчай працы з моладдзю.

Наведвальнікі выставы змаглі выпрабаваць методыку біяімпедансаметрычнага абследавання (вымярэнне вагі, вызначэнне мышачнай і касцявой масы, утрыманне тлушчу і вады ў арганізме), якую праводзіла навуковая група кафедры анатоміі, фізіялогіі і бяспекі чалавека ў складзе Я.У.Цітарэнкі, Т.А.Гмір, А.Г.Пархац і студэнты факультэта фізічнага выхавання пад кіраўніцтвам дацэнта А.М.Герасевіча. За перыяд працы выставы-кірмашу абследаванне прайшлі больш за 300 чалавек.

Загадчык кафедры лёгкай атлетыкі, плавання і лыжнага спорту, дацэнт, кандыдат педагагічных навук А.В.Шароў прадставіў функцыянальны прыбор “Алімп-2”.

“Захаваем зямлю чыстай!” – пад такой назвай прайшла экалагічная акцыя, накіраваная на прыцягненне ўвагі наведвальнікаў выставы да праблем аховы навакольнага асяроддзя, на фарміраванне экалагічнай культуры асобы. Арганізатары акцыі – студэнты-валанцёры геаграфічнага факультэта – заклікалі беражліва ставіцца да прыроды.

Арганізатары выставы-кірмашу высока ацанілі працу студэнтаў-валанцёраў псіхолага-педагагічнага і фізіка-матэматычнага факультэтаў.

Студэнты нашага ўніверсітэта пад кіраўніцтвам спецыялістаў студэнцкага клуба выканалі песенныя і танцавальныя нумары ў канцэртнай праграме адкрыцця выставы-кірмашу.

Універсітэт быў адзначаны дыпломам за плённую працу ў справе фарміравання здаровага ладу жыцця насельніцтва.

Аддзел выхаваўчай працы з моладдзю выказвае падзяку ўсім удзельнікам і арганізатарам выставы.

Аддзел выхаваўчай працы з моладдзю,
сацыяльна-педагагічная і псіхалагічная служба