Фотаконкурс «Я і Брэст»

Упершыню ў межах Фестывалю замежных навучэнцаў кафедра агульнага і рускага мовазнаўства правяла фотаконкурс «Я і Брэст» у сацыяльнай сетцы «Укантакце». Любы замежны студэнт, магістрант або слухач факультэта даўніверсітэцкай падрыхтоўкі мог размясціць на сцяне згуртавання «Я і Брэст» свае фотаздымкі, зробленыя ў Брэсце. У конкурсе прынялі ўдзел больш за 30 чалавек з 6 факультэтаў нашага ўніверсітэта, якія прадставілі каля 300 фотаздымкаў.

З 1 лютага па 10 сакавіка ішло адкрытае галасаванне. Каля 700 чалавек наведалі групу за гэты час 4582 разы, мужчын аказалася крыху больш – 51%. Наведвальнікі былі не толькі з Беларусі, але і з Расіі, Туркменістана, Украіны, Азербайджана, Казахстана, Кітая, Германіі, ЗША, Іспаніі, Польшчы, Славакіі, Малдовы, Румыніі. Максімальны лік праглядаў за 1 дзень – 307, максімальная колькасць «лайкаў» за 1 дзень – 338.

Самую вялікую колькасць пастоў стварыў Артыкмырат Гачханаў (філалагічны факультэт), найбольшую колькасць фотаздымкаў падаў Сулейман Гараеў (юрыдычны факультэт).

Прыемнай нечаканасцю для арганізатараў конкурсу стала тое, што шмат хто з удзельнікаў суправаджаў свае фатаграфіі словамі падзякі гораду і ўніверсітэту: «Брэст – гэта тое месца, дзе мы вучымся, знаходзім новых сяброў, маем зносіны і праводзім самыя цікавыя студэнцкія дні ... Дзякуй табе за ўсё. .. Мы вельмі ўдзячныя!!!!» (Саіда Авезава, факультэт замежных моў); «Я хачу сказаць дзякуй гораду Брэсту і ўніверсітэту ў прыватнасці за тое, што яны далі мне магчымасць, дакладней, прымусілі маю сям’ю ганарыцца мной так, як я ганаруся імі. Дзякуй за гэта, горад Брэст, дзякуй за гэта ўніверсітэту...» (Атабалы Орадаў, філалагічны факультэт); «Дзякуй табе, Брэст, за ўсё. Мы вельмі ўдзячныя табе! У нас вельмі дружная група я так рада што мы ўсе дружна вучымся тут!!!» (Сабіна Гараева, філалагічны факультэт). Трое ўдзельнікаў назвалі Брэст другім домам, яшчэ трое прызналіся ў любві да горада ...

Больш за ўсё галасоў за асобныя фатаграфіі сабрала Шырын Аннабердыева (філалагічны факультэт) – 670. Больш за ўсё галасоў за кожную фатаграфію ў сярэднім у Гульнуры Гарлыевай (філалагічны факультэт) – 135. А максімальную колькасць галасоў за адну фатаграфію (486) і за ўсе фатаграфіі і пасты ў цэлым (1254) сабраў студэнт фізіка-матэматычнага факультэта Тымурбек Эшметаў.

Віншуем пераможцаў і дзякуем усім удзельнікам конкурсу!