Рэспубліканская навукова-практычная канферэнцыя «Моўная адзінка ў кантэксце часу»

22 лістапада 2015 года на філалагічным факультэце была праведзена рэспубліканская навукова-практычная канферэнцыя «Моўная адзінка ў кантэксце часу». Арганізатарам канферэнцыі выступіла кафедра беларускага мовазнаўства і дыялекталогіі. У праграме канферэнцыі – каля 90 дакладаў і выступленняў удзельнікаў з Беларусі (Віцебск, Мінск, Гродна, Мазыр, Баранавічы, Пінск), Украіны (Кіраваград, Львоў), Венгрыі (Будапешт), Латвіі (Даўгаўпілс), Польшчы (Люблін), Расіі (Белгарад).

Музычнае прывітанне ўдзельнікам канферэнцыі перадалі навучэнцы Брэсцкага музычнага калежа імя Р. Шырмы.

На мэце канферэнцыі – прасачыць развіццё моўнай адзінкі ў часавым зрэзе і асэнсаваць нацыянальную мову як паказчык багацця культуры народа.

На пленарным пасяджэнні асаблівую цікавасць выклікалі даклады прафесара З.П. Мельнікавай, дацэнтаў М.М. Аляхновіча і А.В. Солахава.

Падчас працы шасці секцый абмяркоўваліся пытанні этналінгвістыкі, лінгвакультуралогіі, фразеалогіі, нацыянальнага характару беларускай лексікі і граматыкі, выкарыстання нацыянальна-культурнага кампанента пры вывучэнні мовы і літаратуры, тэрміналагічнай прасторы, мовы мастацкага твора, а таксама культуралагічнага зместу фонавай лексікі.