VII Міжнародная навуковая канферэнцыя «Славянскія мовы: сістэмна-апісальны і сацыякультурны аспекты даследавання»

26-27 лістапада 2015 г. на філалагічным факультэце Брэсцкага дзяржаўнага ўніверсітэта імя А.С. Пушкіна адбылася VII Міжнародная навуковая канферэнцыя «Славянскія мовы: сістэмна-апісальны і сацыякультурны аспекты даследавання». Канферэнцыя была арганізавана кафедрай агульнага і рускага мовазнаўства з мэтай каардынацыі даследаванняў у галіне функцыянавання і развіцця славянскіх моўных сістэм.

У падобным фармаце філолагі збіраюцца ўжо ў сёмы раз. Шэсць праведзеных сустрэч паказалі, што праблемнае поле канферэнцыі стабілізавалася і выклікае цікавасць у навукоўцаў-славістаў з практычна ўсіх гуманітарных універсітэтаў Беларусі, а таксама з Украіны, Польшчы, Расіі. Высокі міжнародны статус канферэнцыі падтрымала дэлегацыя нашых заходніх суседзяў у складзе прафесара Акадэміі Падляскай у Седльцах, доктара Дануты Міраславы Крамарскай, а таксама Монікі Фамелец (Быдгашч), Марэка Алейніка і Агнешкі Дудэк-Шумігай (Люблін). Адкрываючы канферэнцыю, загадчык кафедры агульнага і рускага мовазнаўства дацэнт В.Б. Пераход падзякавала пастаянным удзельнікам нашага форуму: прафесару А.А. Лукашанцу (Мінск), дацэнту В.М. Волкавай (Сумы), дырэктару гімназіі № 4 А.В. Шкулепе (Брэст), – і ўручыла ім сувеніры.

У гэтым годзе аргкамітэту было прапанавана 147 дакладаў. Пленарнае пасяджэнне адкрыў даклад «Беларуская мова ў сучасным грамадстве: нацыянальная мова і адзінства нацыі» члена-карэспандэнта Нацыянальнай Акадэміі навук, прафесара Аляксандра Аляксандравіча Лукашанца. Тэму «Мова і грамадства» працягнуў прафесар Міжнароднага ўніверсітэта прыроды, грамадства і чалавека «Дубна» (Расія), доктар сацыялагічных навук Пётр Мікалаевіч Кірычок з дакладам «Сацыялінгвістычныя дысанансы масавай інфармацыі ў сучасным грамадстве». Прафесар Нацыянальнага педагагічнага ўніверсітэта імя М.П. Драгаманава (Кіеў), доктар філалагічных навук Людміла Пятроўна Іванова расказала пра рускую і ўкраінскую песні ў ацэнцы А.С. Пушкіна і М.В. Гогаля. Загадчык кафедры рускай мовы Балашоўскага інстытута (Расія), доктар філалагічных навук Марына Робертаўна Шумарына прысвяціла сваё выступленне «Моўны стандарт і субстандарт у люстэрку наіўнай свядомасці» праблемам наіўнай лінгвістыкі. Загадчык кафедры моўнай падрыхтоўкі замежных грамадзян Сумскага дзяржаўнага ўніверсітэта (Украіна) Ларыса Валянцінаўна Бідзенка расказала аб выкарыстанні аўдыёлінгвальнага метаду навучання ў практыцы выкладання РКІ. Праблематыка, зададзеная на пленарным пасяджэнні, абмяркоўвалася падчас працы 10 секцый. Аналіз секцыйных дакладаў паказаў, што ў канферэнцыі сфарміраваўся тэматычны цэнтр – сацыякультурныя працэсы ў славянскіх мовах і рознааспектныя даследаванні нацыянальных дыскурсаў.

На дадзенай канферэнцыі ўпершыню працавала секцыя «Моўныя адзінкі ў даследаваннях маладых навукоўцаў: структура, семантыка, прагматыка». Арганізатары канферэнцыі спадзяюцца, што ўся іх праца будзе карысная маладым даследчыкам і дасць ім магчымасць асабіста пазнаёміцца з вынікамі працы розных навуковых школ.

Аргкамітэт выказвае ўдзячнасць усім філолагам, якія адгукнуліся на яго запрашэнне, і запрашае зноў сустрэцца на гасціннай брэсцкай зямлі праз два гады.

Дацэнт Н.М. Гурына, член аргкамітэта