Семінар «Жыццё без тытуню, алкаголю і наркотыкаў»

17 снежня 2015 года на базе інтэрната № 2 прайшоў семінар «Жыццё без тытуню, алкаголю і наркотыкаў» з удзелам урача-псіхатэрапеўта вышэйшай катэгорыі Л.Л. Рояка (Брэсцкі абласны інстытут развіцця адукацыі). Ініцыятарам і арганізатарам выступіла кафедра методыкі выкладання матэматыкі і інфарматыкі фізіка-матэматычнага факультэта.

Здароўе чалавека – асноўны асабісты рэсурс кожнага. Каштоўнасць здароўя большасцю людзей усведамляецца тады, калі яно пад сур’ёзнай пагрозай або ў пэўнай ступені страчана. Толькі тады і ўзнікае матывацыя – вылечыць хваробу, пазбавіцца ад шкодных звычак, стаць здаровым. Аднак найбольш прымальны шлях – весці здаровы лад жыцця без ужывання алкаголю, тытуню і наркотыкаў.

Леанід Львовіч ў цікавай і гумарыстычнай форме расказаў пра асноўныя нормы паводзін і жыцця людзей, прывёў вялікую колькасць прыкладаў са сваёй практыкі. Цёплая і даверлівая атмасфера, якая ўсталявалася паміж доктарам і студэнтамі, дапамагла ўдзельнікам наладзіць канструктыўны дыялог. Рояк Л.Л. адказаў на пытанні студэнтаў і даў шмат жыццёвых парад. Хочацца верыць, што названы семінар дапаможа выбраць маладым людзям жыццёвы шлях без наркотыкаў, тытуню і алкаголю.

Капіца Л.І.,
старшы выкладчык
кафедры методыкі выкладання матэматыкі і інфарматыкі