Вучуся красамоўству

2 сакавіка 2016 года ў Асветніцка-адукацыйным цэнтры імя У.А. Калесніка адбыўся IV універсітэцкі конкурс аратарскага майстэрства замежных студэнтаў «Вучуся красамоўству». Арганізатарам яго выступіла кафедра агульнага і рускага мовазнаўства.

Мэта гэтага рытарычнага спаборніцтва – прыцягненне ўвагі студэнтаў-інафонаў да найважнейшай ролі вуснага маналагічнага і дыялагічнага маўлення для эфектыўнага валодання рускай мовай у вучэбна-навуковай і прафесійнай дзейнасці, у розных сферах зносін – паўсядзённай, сацыяльна-культурнай і афіцыйна-дзелавой.

Удзельнікамі конкурсу стаў 21 студэнт з 6 факультэтаў: філалагічнага, замежных моў, юрыдычнага, псіхолага-педагагічнага, геаграфічнага і біялагічнага.

У публічных выступленнях на тэму «Кніга ў жыцці сучаснага чалавека» канкурсанты разважалі аб асноўных функцыях кнігі; даказвалі важнасць для грамадства, асобнага чалавека, у тым ліку для самога студэнта, розных відаў літаратуры (вучэбнай, даведачнай, навуковай і навукова-папулярнай, тэхнічнай, мастацкай, дакументальнай, мемуарнай); расказвалі пра творы, якія асабліва ўразілі самога аратара, паўплывалі на яго думкі, учынкі.

У цэлым, узровень усіх выступленняў быў досыць высокі. У выніку напружанай барацьбы ў фінал спаборніцтва выйшлі 10 яго ўдзельнікаў.

Канкурсантам прапанавалі заданні ў рэжыме рыторыкі хуткага рэагавання. Першае, пад назвай «З пачуццём, з толкам, з расстаноўкай», уяўляла сабой выразнае чытанне тэксту. У другім заданні «Ёсць пытанне» студэнты вялі міні-дыялог на хвалюючыя іх тэмы.

Навінкай конкурсу «Вучуся красамоўству» гэтага года стала праца Савета старэйшын (у яго ўвайшлі студэнты – пераможцы конкурсу розных гадоў). Уладальнікам намінацыі «Ведай нашых!» названы студэнт юрыдычнага факультэта Ахмет Бердымырадаў.

На думку журы, лепшымі аратарамі сталі:

1 месца – Азіза Акназарава, студэнтка факультэта замежных моў;

2 месца – Медзіна Шырава, студэнтка юрыдычнага факультэта;

3 месца – Марал Мамедназарава, студэнтка псіхолага-педагагічнага факультэта, і Ахмет Бердымырадаў, студэнт юрыдычнага факультэта.

Віншуем пераможцаў!
Жадаем поспехаў усім удзельнікам конкурсу. Да новых сустрэч!

Кафедра агульнага і рускага мовазнаўства