Хто, калі не мы?!

«Хто, калі не мы?!» – гэтыя словы сталі дэвізам гала-канцэрта Фестывалю замежных студэнтаў, урачыстае закрыццё якога адбылося 10 сакавіка ў Цэнтры моладзевай творчасці.

Традыцыйна арганізатарамі Фестывалю выступілі кафедра агульнага і рускага мовазнаўства, студэнцкі і спартыўны клубы, аддзел выхаваўчай працы з моладдзю, аддзел рэалізацыі праграм даўніверсітэцкай падрыхтоўкі Інстытута павышэння кваліфікацыі і перападрыхтоўкі, а таксама многія факультэты нашага ўніверсітэта.

Праграма фестывалю, што стартаваў 22 лютага, была шырокай: міжуніверсітэцкая і ўніверсітэцкая алімпіяды па рускай мове, конкурс аратарскага майстэрства «Вучуся красамоўству», конкурс фатаграфій і відэаролікаў «Я і Брэст», «Кулінарны рынг», брэйн-рынг на тэму «Год культуры. Код культуры», міжуніверсітэцкі турнір па міні-футболе і многае-многае іншае.

У вечар закрыцця фестывалю былі ўручаны не толькі шматлікія ўзнагароды студэнтам, якія сталі лепшымі па выніках розных мерапрыемстваў, але і падзякі «За годнае выхаванне, фарміраванне працавітасці, пачуцця адказнасці, ветлівага стаўлення і павагі да старэйшых, актыўнай жыццёвай пазіцыі» на адрас бацькоў замежных студэнтаў ад рэктара.

Выдатным дадаткам свята сталі творчыя нумары, падрыхтаваныя студэнтамі. Запальныя танцы і песні, выступленні Клуба вясёлых і знаходлівых, вершы і акцёрскае майстэрства – сапраўдны калейдаскоп талентаў студэнцкай творчасці.

Не абышлося на свяце і без гасцей. Выступленні студэнтаў БрДТУ і дзіцячага народнага ансамбля песні і танца «Прыбужжа» імя Валянціны Верамяюк унеслі свае фарбы ў палітру канцэрта.

Фестываль замежных студэнтаў-2016 скончыўся. Чакаем з нецярпеннем фестываль-2017!

Студэнцкі клуб