Свята дзяцінства

Радасцю, прамяністымі ўсмешкамі і прыемнымі ўражаннямі было напоўнена свята дзяцінства, якое адбылося ў нашым універсітэце 1 чэрвеня ў Дзень абароны дзяцей. Дзеці работнікаў нашага ўніверсітэта сталі ўдзельнікамі займальнага і незабыўнага квест-маршруту, на працягу якога ім трэба было прайсці 7 выпрабаванняў, каб вызваліць ад чар Захавальніцу дзяцінства. Удзельнікаў маршруту суправаджалі іх бацькі, сябры і госці, у якіх з’явілася магчымасць падтрымаць дзяцей і проста прыемна правесці час на свежым паветры. А сустракалі гасцей свята рэктар універсітэта, доктар педагагічных навук, прафесар Г.М. Сендзер, а таксама прарэктар па выхаваўчай і сацыяльнай працы Т.В. Сакалова.

На кожным этапе маршруту юныя госці мелі зносіны з «казачнымі героямі» – студэнтамі-валанцёрамі нашага ўніверсітэта. Дзеці з задавальненнем выканалі падрыхтаваныя для іх заданні: паўдзельнічалі ў танцавальнай эстафеце, музычнай віктарыне, экспромт-выступленні тэатра, спартыўных спаборніцтвах і інш. Юныя вандроўнікі паспяхова справіліся з выпрабаваннямі і накіраваліся ў «Краіну Нябачаных Прыгод». Кожнаму з удзельнікаў квеста быў зроблены аква-грым, а таксама падораны невялікія сувеніры з паветраных шароў. Але самым прыемным сюрпрызам для дзяцей сталі забаўляльныя атракцыёны – батуты. Атмасфера свята была пазітыўнай і прыемнай для ўсіх.

Прадоўжылася свята ў актавай зале вучэбнага корпуса № 2, дзе адбыўся канцэрт «Наша шчаслівае дзяцінства». Юныя артысты – дзеці супрацоўнікаў універсітэта узростам ад 3 да 15 гадоў – парадавалі гледачоў калейдаскопам сваёй творчасці: дэфіле мод, вакальнымі нумарамі, чытаннем вершаў, танцавальнымі і акрабатычнымі кампазіцыямі. Акрамя гэтага, у актавай зале размясцілася яркая выстава дзіцячых работ дэкаратыўна-прыкладнога мастацтва, удзельнікамі якой сталі больш за 60 хлопчыкаў і дзяўчынак. На выставе былі прадэманстраваны вырабы з «Лега», з керамікі, карціны, напісаныя акварэллю і алеем і інш. Усе ўдзельнікі канцэрта і выставы атрымалі прыемныя падарункі.

Светлыя твары дзяцей, іх цёплыя ўсмешкі – самая вялікая падзяка для арганізатараў свята дзяцінства, якімі выступілі рэктарат, прафкам работнікаў, аддзел выхаваўчай працы з моладдзю, сацыяльна-педагагічны факультэт, а таксама студэнцкі клуб.