Экскурсія ў Нацыянальны парк «Белавежская пушча»

26 лістапада 2016 г. прафкам работнікаў установы адукацыі «Брэсцкі дзяржаўны ўніверсітэт імя А.С. Пушкіна» арганізаваў для сваіх работнікаў і іх дзяцей цікавае падарожжа ў Нацыянальны парк «Белавежская пушча». У экскурсійную праграму было ўключана наведванне музея прыроды і рэзідэнцыі Дзеда Мароза, а таксама аглядавая экскурсія па пушчы.

У 9.20 наша група прыбыла ў Нацыянальны парк. Была цудоўная ціхая раніца. Лістападаўскае сонца ўжо пачынала прасвечваць праз аблокі. Яшчэ не нахлынуў асноўны паток наведвальнікаў, таму мы змаглі атрымаць асалоду ад цішыні.

Спачатку мы адправіліся ў музей прыроды, экспанаты якога ўражваюць сваёй рэалістычнасцю. У музеі мы пачулі дзіўныя гісторыі з жыцця жывёл, даўніх насельнікаў пушчы. Мы блукалі па выставачных залах і ўяўлялі сябе ўдзельнікамі царскага палявання дзесьці ў глыбіні заказніка сам-насам з прыродай. Пасля экскурсіі па музеі наша група падзялілася: бацькі з дзецьмі паехалі ў госці да Дзеда Мароза, а астатнія экскурсанты адправіліся ў аглядавую паездку па Белавежскай пушчы з наведваннем новага музея народнага побыту і старадаўніх промыслаў.

Лясы пушчы ўражваюць сваёй веліччу і манументальнасцю: грабавыя, бярозавыя гаі, дубровы, азёры, балоты, маладыя пасадкі хвоі на месцы дрэў, паваленых ураганам у 2012 г., трохсотгадовая хвоя, дуб-патрыярх, што пабачыў за шэсць стагоддзяў свайго жыцця нямала цікавых падзей ...

Нядаўна адкрыты музей народнага побыту і старадаўніх промыслаў цікавы для наведвальнікаў, якія хочуць убачыць на свае вочы аўтэнтычныя прадметы побыту беларускага народа.

Пасля аглядавай экскурсіі мы, падзякаваўшы экскурсаводу, пайшлі на прагулку вакол вальераў з жывёламі.

Наша экскурсійная праграма была вычарпана і мы, з новымі ўражаннямі, натхнёныя і радасныя, адправіліся ў родны горад Брэст.

Л.Б. Чэлышава, старшыня прафкама работнікаў