Прафарыентацыйны праект «Выбар прафесіі і развіццё асобы» стартаваў у Кобрынскай дзіцячай вёсцы

26 лістапада 2016 года ў Кобрынскай дзіцячай вёсцы стартаваў прафарыентацыйны праект «Выбар прафесіі і развіццё асобы». У рэалізацыі праекта задзейнічаны выкладчыкі псіхолага-педагагічнага факультэта УА «Брэсцкі дзяржаўны ўніверсітэт імя А.С. Пушкіна» А.В. Севярын і Л.А. Цыбаева, а таксама студэнты-валанцёры 1, 2 і 4 курсаў псіхолага-педагагічнага факультэта (спецыяльнасць «Псіхалогія»).

У праграму праекта ўвайшлі тры групы мерапрыемстваў:

Першая група: прафарыентацыя і роздум.

• візуальная прэзентацыя прафесій і спецыяльнасцей, па якіх можна атрымаць прафесійную падрыхтоўку ў БрДУ імя А.С. Пушкіна на псіхолага-педагагічным факультэце;
• прагляд і абмеркаванне відэароліка «Выбар прафесіі» (пра матывы выбару прафесіі);
• адкрыты дыялог «Ключы прафесіі», у якім разглядаліся фактары выбару прафесіі, абмяркоўваліся сакрэты паспяховасці асваення прафесіі і самарэалізацыі ў ёй. Актывізаваў удзел выхаванцаў Кобрынскай дзіцячай вёскі ў дыялогу і абмеркаванні, а таксама адказваў на іх пытанні старшы выкладчык кафедры псіхалогіі Аляксей Віктаравіч Севярын.

Другая група: прафарыентацыя і згуртаванне.

• інтэрактыўныя гульні «Асацыяцыі» і «Ланцужок», у якія ўмела уцягнулі дзяцей студэнты 4 курса псіхолага-педагагічнага факультэта спецыяльнасці «Псіхалогія» Антон Сыч і Антон Шыла.

Трэцяя група: эстэтычнае выхаванне і эмацыйная разрадка.

• сустрэча з выканаўцам-вакалістам студэнтам 2 курса Сілаевым Аляксеем.
• арт-майстэрня па сучасных танцах ад студэнта 1 курса Андрэя Казлюка.

Добрай традыцыяй завяршэння такіх мерапрыемстваў стала фотасесія з патэнцыяльнымі абітурыентамі ВНУ на фоне дрэва выпускнікоў Кобрынскай дзіцячай вёскі. Усе ўдзельнікі сустрэч атрымалі ад іх зарад станоўчых эмоцый. У ходзе рэалізацыі праекта былі ўдакладнены ўяўленні дзяцей аб прафесіях, праведзены мерапрыемствы па згуртаванні дзяцей і іх эстэтычным выхаванні.

Дэканат псіхолага-педагагічнага факультэта