Тыдзень біялагічнага факультэта

Дазволіўшы вясне ўступіць у свае правы, біялагічны факультэт пачаў святкаваць свой чарговы Дзень нараджэння.

З 12 па 16 сакавіка на факультэце кіпела яркае жыццё, поўнае запалу, фарбаў і вясновага настрою. Тут былі і навуковыя семінары, і інтэлектуальныя гульні, і разнастайныя конкурсы, і запальныя танцы.

У рамках навуковага семінара «Актуальныя навуковыя напрамкі біялагічнага факультэта» вядучыя навукоўцы факультэта азнаёмілі першакурснікаў з тымі навуковымі накірункамі, якія распрацоўваюцца ў сценах факультэта, што, безумоўна, дапаможа студэнтам вызначыцца з выбарам напрамку сваёй навукова-даследчай працы.

Паказаць свой розум і кемлівасць, а таксама хуткасць ног студэнты маглі ў інтэлектуальным квесце «У пошуках ісціны». Пры выкананні найцікавейшых задач і рашэнні найскладанейшых галаваломак удзельнікам квеста не хапала толькі шуму мора за сценамі каменных калідораў, каб адчуць сябе ў сценах знакамітага форта Байяр.

На прасторах сусветнай павуціны прайшоў конкурс «Мой хатні гадаванец», дзе студэнты дзяліліся пачуццямі да сваіх хатніх любімцаў. Пухнатыя кацяняты і гуллівыя шчанюкі, самавітыя абаронцы дома і ласкавыя коні, а таксама хатняя пацукі, якія па-свойму зачароўваюць, – вось пералік хатніх гадаванцаў нашых студэнтаў. 

Сапраўдным жа упрыгожаннем свята стаў конкурс «Міс біялагічнага факультэта–2018» – падзея, якая стала апафеозам цэлай чарады выдатных мерапрыемстваў. Падзея, на якой прыгажуні факультэта не пабаяліся кінуць адна адной выклік, паказаўшы не толькі сваю прыгажосць, але і ўменне трымаць сябе пры розных абставінах, лагічна выкладаць думкі, здзіўляць талентамі і здольнасцю зачараваць гледачоў, якія і пасля заканчэння конкурсу ніяк не хацелі разыходзіцца.

За гэты час на факультэце вырасла «Дрэва біялагічнага факультэта», на якім кожны студэнт пакідаў свой лісточак – адбітак рукі.

З Днём Нараджэння, біялагічны факультэт!

Дэканат біялагічнага факультэта