Першы прафесійны конкурс «Кулінарны паядынак»

19 красавіка паміж сталоўкамі гандлёвага цэнтра БрДУ адбыўся Першы прафесійны конкурс «Кулінарны паядынак».

Адкрыла «Кулінарны паядынак» прыхільніца здаровай ежы і здаровага ладу жыцця, рэктар універсітэта Анна Мікалаеўна Сендзер. Анна Мікалаеўна падкрэсліла, што правільнае харчаванне – аснова добрага самаадчування і прыгажосці, а работнікі харчблока альма-матар ведаюць, якія стравы неабходна гатаваць, каб рацыён быў багаты вітамінамі і мінераламі.

Конкурс уключаў чатыры этапы. Першы – творчы. Каманды прадставілі сябе. Падчас выпрабавання «Прафесійны сакрэт» удзельнікі прэзентавалі прыгатаваныя загадзя халодныя закускі, салаты і гарачае. Таксама яны расказалі пра карысныя ўласцівасці інгрэдыентаў, з якіх прыгатаваны стравы.

Паколькі работнікі нашага гандлёвага цэнтра гатуюць не толькі смачна, але і хутка, падчас трэцяга тура ўдзельнікам прапанавалі за пэўны час абабраць бульбу.

А самы доўгачаканы быў апошні этап – «Дэгустацыя». Члены журы, у склад якога ўваходзілі прадстаўнікі рэктарата, дэканы факультэтаў і начальнікі структурных падраздзяленняў, паспрабавалі прэзентаваныя стравы і выбралі лепшыя.

Пакуль падліковая камісія падводзіла вынікі, пазітыўны настрой музычнымі нумарамі стваралі студэнты.

Пераможцам «Кулінарнага паядынку» стала сталовая № 3. Узнагароджваючы работнікаў гандлёвага цэнтра граматамі і прызамі ад універсітэта, Ганна Мікалаеўна адзначыла, што дэбют быў удалым, а значыць, у наступным годзе нашы ўмелыя кулінары будуць здзіўляць новымі далікатэсамі. Таксама яна выказала ўпэўненасць у тым, што такія мерапрыемствы гуртуюць калектыў, умацоўваюць карпаратыўны дух. Камандам, якія занялі першае і другое месцы, былі ўручаны падарункі ад прафкама работнікаў.

Юлія Воўк, рэдактар студэнцкага клуба