Працоўны марафон: БрДУ прыняў удзел у агульнарэспубліканскім суботніку

21 красавіка ў Беларусі адбыўся агульнарэспубліканскі суботнік. Нароўні з людзьмі ў зялёных камізэльках на вуліцы з прыбіральным інвентаром выйшлі работнікі прадпрыемстваў, арганізацый і ўстаноў. Не выключэнне і наш універсітэт: у мінулую суботу супрацоўнікаў і студэнтаў аб’яднала жаданне зрабіць горад чысцейшым.

Мётлы, граблі і пальчаткі на некалькі гадзін сталі лепшымі сябрамі ўдзельнікаў суботніка. Сэнс удзелу ў ім кожны вызначыў для сябе сам: хтосьці хацеў пацьмянелыя за зіму вуліцы зрабіць ярчэйшымі, хтосьці ўнесці свой уклад у захаванне гістарычнай памяці, а нехта ўласным прыкладам паказаць, што да тысячагоддзя любімага горада трэба пачынаць рыхтавацца ўжо зараз. Студэнты і работнікі БрДУ акультурвалі тэрыторыю каля карпусоў універсітэта, інтэрнатаў, алею славы, а таксама свой гонар – зімовы сад. А ў Год малой радзімы працавалі з яшчэ большым энтузіязмам, чым звычайна.

Цяпер, гледзячы на яркія фарбы, якімі ў сонечных промнях пераліваюцца кветкі, зялёная трава і лістота на пасаджаных дрэвах, мы смела сцвярджаем, што ў нас атрымалася зрабіць родны горад прыгажэйшым.

Юлія Воўк, рэдактар студэнцкага клуба