Візіт дэлегацыі з Сербіі

17–19 кастрычніка 2018 года ў рамках міжнароднага супрацоўніцтва наш універсітэт наведала дэлегацыя ў складзе чатырох чалавек з сербскага горада Нові-Сад. Выкладчыкі з Сербіі сумесна з супрацоўнікамі БрДУ імя А.С. Пушкіна рэалізуюць на базе біялагічнага факультэта і Цэнтра экалогіі навукова-тэхнічны праект «Фенольныя злучэнні і антыаксідантная актыўнасць пладоў вішні і чарэшні сербскай і беларускай селекцыі». Гэты праект прайшоў конкурсны адбор у Дзяржаўным камітэце па навуцы і тэхналогіях Рэспублікі Беларусь (ДКНТ) і фінансуецца Беларускім фондам фундаментальных даследаванняў (БРФФД) і Міністэрствам адукацыі Сербіі.

Праграма знаходжання гасцей былі даволі насычаная: акрамя знаёмства з універсітэтам, яго кіраўніцтвам, кафедрамі, батанічнымі садамі і навуковымі лабараторыямі, госці з Сербіі прадставілі на навуковым семінары апошнія дасягненні сербскай навукі ў галінах біяхіміі, біятэхналогіі і сельскай гаспадаркі. Асаблівую цікавасць у студэнтаў і выкладчыкаў выклікала выступленне прафесара Дэжана Првуловіча пра дасягненні сербскіх прыродазнаўцаў і магчымасці правядзення сумесных навуковых мерапрыемстваў і стажыровак. Было прынята рашэнне аб падпісанні дамовы аб далейшым міжнародным супрацоўніцтве паміж універсітэтамі-партнёрамі.

Сімвалічна, што менавіта прадстаўнікі горада Нові-Сад удзельнічалі ў закладцы вішнёва-чарэшневага саду ў аддзеле «Аграбіялогія» Цэнтра экалогіі. Былі высаджаны маладыя дрэвы беларускай селекцыі.

Кіраўнік праекта з беларускага боку – загадчык кафедры хіміі Колбас Наталля Юр’еўна – расказала пра тое, што плануецца разбіць сад на тэрыторыі каля 20 сотак. У рамках сумеснага праекта мяркуецца не толькі вывучэнне біяхімічнага складу пладоў гатункаў вішні і чарэшні, што растуць на тэрыторыі Беларусі і Сербіі, але і абмен генетычным матэрыялам з мэтай магчымага выкарыстання ў селекцыйнай працы. Першасны адбор інтрадуцыраваных гатункаў вядзецца па шэрагу прыкмет і паказчыкаў: зімаўстойлівасць, хуткаплоднасць, ураджайнасць, устойлівасць да хвароб і фітанутрыентная каштоўнасць. З мэтай вывучэння спажывецкага попыту праводзяцца дэгустацыі пладоў з высокім утрыманнем фенольных рэчываў і антыаксідантнай актыўнасцю.

Плануецца далейшае правядзенне сумесных семінараў і навукова-практычнай канферэнцыі з мэтай абмену вопытам, апрабацыі і папулярызацыі атрыманых навуковых вынікаў. Асноўныя пасадкі саду – а гэта больш за 200 дрэў вішні і чарэшні – запланаваны на 2019 год – год 1000-годдзя нашага роднага Брэста.

Цэнтр экалогіі