Аляксандра Мышленік – Каралева студэнцтва БрДУ

Універсітэцкі этап Рэспубліканскага конкурсу грацыі і таленту “Каралева студэнцтва Беларусі 2022” прайшоў у БрДУ імя А.С. Пушкіна 13 красавіка. Яго арганізатарам стаў Беларускі рэспубліканскі саюз моладзі.

З прывітальным словам да ўдзельнікаў мерапрыемства звярнулася прарэктар па выхаваўчай працы Таццяна Сакалова.

Прыгажуні прынялі ўдзел у пяці выпрабаваннях. У конкурсе відэаролікаў “Я – студэнтка БрДУ імя А.С. Пушкіна” яны пазнаёмілі аўдыторыю са сваімі дасягненнямі. Прыемнае ўражанне ў гледачоў пакінула дэфіле – дзяўчаты прадэманстравалі добрую фізічную форму.

Падчас творчага конкурсу ўдзельніцы выявілі свае вакальныя, харэаграфічныя і акцёрскія здольнасці. На этапе прамоўніцкага майстэрства яны выступілі з выказваннямі на тэму  захавання гістарычнай памяці – гаварылі пра значымыя для Беларусі падзеі, пра сваю малую радзіму і каштоўнасць міру на зямлі.

Журы ацэньвала грацыю, артыстызм, уменне трымацца на сцэне, выказвацца і імправізаваць.

Па выніках конкурсу ўладальніцай галоўнага тытулу стала студэнтка гістарычнага факультэта Аляксандра Мышленік. Яна ж абрана “Каралевай студэнцтва ONLINE”. Тытул “Першая віцэ-Каралева студэнцтва” атрымала Мая Бегчава, якая вучыцца на сацыяльна-педагагічным факультэце. Другой віцэ-Каралевай стала студэнтка фізіка-матэматычнага факультэта Вольга Катовіч. Усе астатнія ўдзельніцы прызнаны пераможцамі ў розных намінацыях.

Юлія Воўк