Спартыўнае свята «Дні спорту і здароўя»

З 14 па 26 лістапада ў нашым універсітэце прайшло традыцыйнае спартыўнае свята «Дні спорту і здароўя», арганізатарам якога стала кафедра фізічнай культуры. Многія мерапрыемствы прайшлі ў новым фармаце.

Найбольш значнымі на свяце можна назваць наступныя мерапрыемствы ўніверсітэцкага ўзроўню:

• Сустрэча студэнтаў універсітэта з футбалістамі-легіянерамі ФК «Дынама-Брэст». Зносіны студэнтаў і спартсменаў праходзілі на англійскай мове. Ініцыятарам сустрэчы стала выкладчык кафедры замежных моў Т.В. Краўчанка;
• Сумесна з камітэтам прафсаюзаў работнікаў універсітэта было праведзена першынства ўніверсітэта па настольным тэнісе сярод прафесарска-выкладчыцкага складу ўніверсітэта;
• Упершыню прайшла адкрытая алімпіяда па дысцыпліне «Фізічная культура» сярод студэнтаў няпрофільных спецыяльнасцей БрДУ імя А.С. Пушкіна, БрДТУ, навучэнцаў СШ № 9 г. Брэста.

Асноўнымі традыцыйнымі мерапрыемствамі міжфакультэцкага і факультэцкага ўзроўню былі наступныя:

• Турнір па валейболе сярод мужчынскіх каманд памяці А.Г. Гародніка (I месца – гістарычны факультэт; II месца – фізіка-матэматычны факультэт; III месца – юрыдычны факультэт);
• Міжфакультэцкі конкурс мультымедыя-прэзентацый «Здароўестваральныя тэхналогіі ў жыццядзейнасці чалавека»;
• Спартландыя паміж камандамі геаграфічнага факультэта, факультэта замежных моў і запрошаных гасцей – навучэнцаў Брэсцкага дзяржаўнага тэхнічнага каледжа.

У рамках «Дзён спорту і здароўя» таксама прайшлі навукова-адукацыйныя мерапрыемствы. 25 лістапада адбылася IV рэгіянальная студэнцкая навукова-практычная канферэнцыя «Фізічная культура ў жыцці студэнта», у якой прынялі ўдзел больш за 140 навучэнцаў з БрДУ імя А.С. Пушкіна і БрДТУ, а таксама з Ваеннай Акадэміі РБ (г. Мінск). У рамках канферэнцыі была падрыхтавана навукова-практычная выстава «Вучэбна-метадычнае забеспячэнне вучэбнай дысцыпліны «Фізічная культура» – ад мінулага да сучаснасці». У гэты ж дзень прайшоў міжвузаўскі вучэбна-метадычны семінар «Праблемы выкладання дысцыпліны “Фізічная культура”» для выкладчыкаў кафедры фізічнай культуры БрДУ імя А.С. Пушкіна і кафедры фізічнага выхавання і спорту БрДТУ.

Акрамя гэтага, у рамках спартыўнага свята было праведзена больш за 15 майстар-класаў па фітнэсе, ёгу, пілатэсу, петанку, камандаўтварэнню, рухомых гульнях і інш.

Кафедра фізічнай культуры